Ricard Camarenak astelehenean egin zuen bezala, Merlin Labron-Johnson britainiarrak (Osip*, Bruton) bere hitzaldian zera azpimarratu zuen: lurrak ematen duenarekin bakarrik lan egiteak askatasuna eta sormen-aukerak ematen ditu. "Londresen nengoenean (Portland jatetxe Michelin izarduna kudeatu zuen), telefonoa hartu eta nahi nuen guztia lortzen nuen. Hona iritsi nintzenean, berriz, desberdina zela ikusi nuen, eta hala izan zedin nahi nuen. Hemen, Somerset konderrian, Ingalaterrako hego-mendebaldean, laur hauetan, Labron-Johnsonek sustraiak bota ditu eta etxalde bat jarri du martxan.

Chefak berak azaldu zuen nola lortu duen benetako "Farm to table" ("Baserritik mahaira") jatetxe bat irekitzea: "Jatetxea pandemia hasi baino hilabete lehenago ireki nuen. Teorian, karta izango zuen eta ohiko modura funtzionatuko zuen, baina pandemiak dena aldatu zuen. Berriro ireki genuenean, baserri modura eta karta finkorik gabeko jatetxe modura egin genuen; nire baratzetik eta nire konfiantzakoak diren gertuko eta tokiko ekoizleetatik iristen zaidana baino ez dut kuzinatzen". Aitortzen zuenez, gaur egun duen rola ez da soil-soilik sukaldari batena: "Landaren eta sukaldearen arteko bitartekari bihurtu naiz".

Gauzak horrela, Osip gaur egun jatetxe ez-begetariano gisa aurkezten du bere establezimendua, kartaren % 90 begetarianoa bada ere; eta baratze propioa izateaz gain, ur-zirkuitu itxia ere badu (baliabidea maximizatzeko). "Horrela lan egiteak sormena pizten du, dagoenarekin lan egiten duzulako", errepikatzen zuen. Adibide modura, akuaponiako amuarraina erabiliz, bi plater prestatu ditu. Bata sushi formatuan dago; amuarraina onduta eta zerrendaka moztuta dago, eta zerrenda horiek sagarrekin (sagarra asko erabiltzen da Somerset konderrian) eta errefauekin biribilkatzen dira (biak xafla finetan ebakita mandolina japoniar batekin). Loreekin eta petaloekin estaltzen diren sushi txikiak osatzeko, kardu-hostoak erabiltzen ditu algen ordez.

Bigarren platerean, amuarraina kubotan ebaki du, eta jarraian, tartar bat egin du krema freskoa eta tipulinak erabiliz; azkenik, errefau gordinezko xaflekin estali du dena. "Errezeta errazak, osagai gutxikoak", baina sormen handikoak. Sukaldaritza naturala, "Baserritik mahaira". Sukaldaritza burutsua, dagoenarekin egina.