Roberta Hall McCarronek (The Little Chartroom, Edinburgo) usakume bat erremolatxazko ketchuparekin eta arrain ketu bat prestatu ditu. "Eskozia mendia eta kostaldea da".

Edinburgoko Chef Errebelazio Saria irabazita, Roberta Hall McCarronek The Little Chartroom jatetxea ireki zuen 2018an, Eskoziako hainbat jatetxetako sutegietatik igaro ondoren. The Little Chartroom Edinburgoko jatetxerik onena izendatua dago; bertan, Hall McCarronek bere kostaldean du begirada jarrita, arrainik onenak eta hango nekazari txikiek eramaten dizkioten produktuak konbinatuz. Haren hitzetan, "Eskoziako produktuak eta platerak prestatzen ditut, baina mundura irekita nago beti, eta ukitu pertsonalak ematen ditut. Hori bai, sukaldariok kalitate oneko produktuen erakusleihoa izan behar dugu", azaldu zuen sukaldariak eszenatokira igo zenean.

Parrillaren eta produktu ketuen zale amorratua, Hall McCarronek (eskoziar guztien antzera, oro har) ehizarako grina erakutsi du Gastronomikan. "Ehiza abuztuaren 12an hasten da, eta hortik aurrera, jatetxean ehiza baino ez dut ateratzen plater nagusi modura". Horregatik, sukaldariak usakume bat moztu eta prestatu du hor bertan, "baina ahatea, eperra, galeperra edota beste edozer kuzinatu nezakeen, edozein ehizaki gustatzen zaigulako". Erremolatxekin eta masustekin prestatu du, "zapore horiek ehizakien zapore gogorrarekin oso ondo konbinatzen dutelako"; bestalde, erremolatxa eta baiak erabiliz ketchup bat ere egin du, eta agar-agarra gehitu dio, "testura urintsu bat lortzeko".

Kinoaz eta sarrazeno gariaz lagunduta, emaitza benetan berezia da, zapore indartsua baitu, baina estetika aski minimalista da, "erremolatxa-zapore handia du, eta hori asko gustatzen zait", esan zuen chefak. Edinburgo Erresuma Batuko hiriburu gastronomiko gisa finkatzen ari diren sukaldarietako baten hitzak dira.

McCarronek arrain bat ere prestatu du. Kasu honetan, abadira ketu bat da, esnearekin eta esnegainarekin infusionatua, eta horrela saltsa bat sortu du, gatzetan eta azukreetan ondutako solomoa laguntzeko.  "Platera ahoan dibertigarria da, arrain  hotza eta saltsa beroa nahasten dituelako". Amaitzeko, sukaldariak "haggis" bat prestatu du. Eskoziako plater nazional bat da, baina oraingoan, usakumearen barrukiekin prestatu du; gero, hura urdailean sartu eta zartaginean egin du.